Gait van de Renderklippen

Kom ie aover de kop dan kom ie ok aover de stàt. Ik kriege Annegien d'r niet mee an 't lachen. Ze kik mien met een zoer gezichte an. Ok weer niet zo verwonderlijk. 't Geet umme Bouffon, de Franse bulldog. Ja,a-j 't letterlijk nemp is 't allemaole een fluitien van een cent. De stàt van de Franse bullen meug de name niet hemmen. Mar figuurlijk zit 't effies anders in mekare. Annegien löt 'm zo noe en dan de vrieheid. Op de Renderklippen mut dat kunnen. Van de wèke ok.Mar wat denk ie? De zwàtte jonge ging d'r as een hazewind vandeur. Annegien zag 'm as een stip in de vàrte. Toen buurman Knelis effies later melden dat die 'm halverwège 't Eper darp had zien stiefelen worden zee ongerus. Ze hef nog een olde motor in de schure staon. Daor 't stof of eblaozen en nao een keer of tien antrampen vleug 't dink weg. Niet zo hgeel veule later kwamp ze weer op huus an. Zonder hond en……zonder motor. Die had de gees egeven, was in elk geval niet van zins umme zich op te laoten jagen nao maondenlange niks doen. Tja, wat dan? Ze was niet ansprèèkbaar. Deuk de schure in en kwamp met de Harlie Trapson weer nao buten. Op de fietse dus weer in de achtervolging van 't kleine zwàtte monster. 't Hiel d'r nogal veur.

En ie wilt 't geleueven of niet, weer Annegien op 't hofpad en vanniejs zonder Bouffon. Op ene van de bulten was eur de ketten d'r of elopen. Ze was vinnig an 't knooien ewes umme 't dink weer op de plekke te kriegen mar zonder risseltaot. Of eigenlijk ok weer wel. Twee arms van een baggerwàrker en dat was 't risseltaot niet waor as zee op zat te wachten. Merie en ikke heb niks evraog en nog minder ezeg, want in die situaties völt alles verkeerd. Met zien driejen nog is op jacht mar wat wie ok zagen en wat wie ok vunnen, gien Franse bull. Toen wule in de veurkamer zaten veur ze-k mar an de koffie zaten veur familieberaod sprung d'r iets veur de ramen heer. Nèt niet zichtbaar. Mar toen dat onzichtbare ding geluud maken en begun te blaffen was 't helder wat zich daor voort bewaog. Bouffon van de Renderklippen umme 't mar is zo te zeggen.

Mar hee was niet allene. Ok een manspersoon liep bie 'm. Dat was een boodschapper van de schaophàdder za-k mar zeggen. Die vreug an Annegien wat zee veur de hond mos hebben. Ze stun op 't punt umme te zeggen dat ze 'm veur niks kon meenemen, mar toen ze in de grote brune ogen keek en 't diertien eur aover de hande begun te likken smölt de helligheid as een ijsco in de woestijn, umme met de baord Vinke te praoten. Mar weurumme die belangstelling? De man kwam zeggen dat Bouffon bie de kudde was neer estreken. Schaopen die aover 't fietspad wollen jeug hee weer terug. Annegien scheut in de lach. ,,Noe heb ik een Franse bull en een herdershond hazewindhond veur ene pries", zei zee. Mar 't was toch nog wel effies anpakken. Met de trekker van Knelis mos zee een weerbarstige motor en een kapotte fietse ophalen. 't Gebeuren allemaole op zwàtte zaoterdag. Zeg tegen Annegien niet dat die allenig in Frankriek veur kump. Ze kan 't oe anders vertellen. Mar Bouffon blif veurlopig wel an de lijn zitten. Arm schaop van een hond zeg Merie. Luu, maak d'r iets moois van met mekander.

Groetenisse van GAIT.