Gait van de Renderklippen

Ze bint een biejenvereniging, die van De Imme, mar ze holt niet van stroop umme de mond smeren en al helemaole gien heunig. Dat is wel ebleken op de viefenzestigste mâârk diet ze bie 't gemeentehuus hielen. Veur 't Meneertien van de Krante was de bij-zaak 't interessantste. Hans Stikvoort moch 't spul wa-j nuump officieel lös doen. Ie konnen wel màrken dat hee van de veurgaonde vierenzestig keer d'r niet veule mee hef emaak. De inleiding had iets van ach en wee richting bee en wee. ,,,We hebben nog nooit een burgemeester gehad die deze markt opende", zei hee töt twee keer toe. Dat hef veule weg van wa-j Hans niet leert zal Hansje niet weten. Ik zie nog Leo Eland d'r staon. Dat was zelf een imker en niet zo'n klongel ok. Die kon 't publiek nog op zien eentien een bonke wiezer maken. Ok zien veurgangers van Renken töt Bergh en van Beuke töt De Loor waren d'r bie-toeren. Joop van Nuijs mos 't liejen. Die kreeg de hele laoge aover zich heer.

En of ie 't noe geleuf of niet, 't ambtelijke apperaat mos de Silo van Bibo invlechten umme de ketten op te halen, want zonder een börgemeester, in dit geval de vierde loco, gien opening.

Misschiens hef Joop stiekem in de tasse van Stikvoort ekeken en daor een pöttien heunig ezien wat veur um bestemp was. Mar hee lag die woensdaggenmâân mooi bie de Imme an de ketten, umme 't zo mar is te zeggen. Een heel klein bettien geliek hef Hans wel, want a-j 't mien vraog löt Hans van der Hoeve 't meestentieds ofweten. Die zit dan op zien eigen schip en hölt tegelieke de boot of. Hee hef de ketten wel op 't gemeentetehuus laoten liggen zodat de biejenmâârk niet de boot in ging. Misschiens hef Hans 't niet zo op biejen.'t Is vanzelf ok gien hoofd- mar een bijzaak. Volges veurlichting stik d'r niks achter. Van der Hoeve hoef niet bange te wèèn veur un prik aksie: 't bint allemaole tamme biejen heb ze mien verteld. In Heerde was de helfte van 't college vot. Op vakantie. Gerrit van Diek en Inez Pijnenburg maken d'r een liberaal onderonsje van. Vrijheid blijheid.

Umme dudelijk te maken da-j op die beien kunt bouwen en d'r mee kunt huzen leggen ze 't ene nao 't andere woningproject bie de media op de taofel., Ik mudde zeggen dat d'r beroerder parsvoer is te bedenken.

Mar 't is vanzelf wel an de raod umme te beslissen en te zörgen dat 't in Waopmvelde niet aoverKolk. Met Wilhelmina en Kristal gif Heerde wel een schoolveurbeeld hoe a'j 't volk onder dak kunt kriegen. Ze heb nao protesten van de buurte 't wel effies mutten parkeren, mar noe alles en iederene op (de) heugte is zal 't wel goed komen. Ik bin d'r niej nao hoe't met 't vliegen van en nao Lelystad of lup.

Paddie luu denk dat de toeristen weg vlieg en dan krie'j d'r nog meer gebrom bie. T'r land en in de lucht. 't Kan nog slimmer as de veurstanders van windmeulens 't veur 't zeggen krieg. Dan zit ie temee in eklemp tussen twee snelwègen, met geknetter in de luch.

Dat wèèjt niet aover al zet ie d'r vieftig van de meules neer. Wie wind mèèjt zal störm oogsten. Luu, Merie rup umme de koffie en ik sluute 't huukien veur disse wèke of.

Holt de klongels d'r onder. GAIT