Gait van de Renderklippen

Da-j oe niet op oe gemak vuult met een reus in de buurte is begriepelijk. Dat wordt nog wat slimmer as 't umme twee reuzen geet. Vlaamse reuzen wel te verstaon. Annegien had d'r mee van doen. Reuzen op ofstand, dat wel weer. Ik heure paddie luu zeggen: da's toch bie de wilde knienen of. Die zit knap in de buurte trouwens, want 't geet umme twee van die butenmodel knienen waor as zee mee te maken kreeg op de alarmcentrale in Dèventer. Annegien help van daor uut in heel Europa gemobiliseerd verkeer met problemen uut de brand. As't effies kan. In dit geval kon dat niet. Dat wil zeggen wel veur de heikneuter uut 't noorden van Nederland, die in België de boel te hetter en te fletter reej. Hee smeren 'm en liet de brokstukken achter. Annegien halen zoas dat heurt de ofslepdienst d'r bie. 't Duren mar effies of de slepers melden zich. Wat ze met de Vlaamse Reuzen an mossen. Ie kunt oie veurstellen dat eur de oren begonnen te soezen. Verklaor oe nader, zal ze hebben ezegd. Wat bleek: achterin de gestrande auto, tussen de brokstukken, zaten twee Vlaamse Reuzen in een groot hok. De slepers waren dierenvrienden. Ze heb de diers, die daor al twee dagen in de brandende zunne stunnen, vers water egeven en wörtelties.

Mar 't is nogal logisch dat ze wel wollen weten wat d'r wieter veur de res met de knienen mos gebeuren. Tja, daor zat Annegien met een raodsel. 't Hef eur een tillefoneren van jewelste ekost umme de bestuurder uut 't noorden op te sporen. Dier was ok weer niet de eigenaar van de knienen. Nog weer an de kletsdraod töt dat 't dink roodgluuiend raken.Mar toen had ze dan toch de man te pakken waor de auto an toe beheuren. Wat de Vlaamse reuzen angeet was hee gauw klaor.,,Ie doet d'rmar mee wat a-j wilt, kaok d'r mar soep van." Dat mu'j noe net niet tegen dat deerntien zeggen, want die hef een groot hàtte veur diers. Ze hiel zich nog in en vreug alleent mar of hee dan ofstand wol doen van de beeste. Dat gunk an. Toen was zee eigenaresse van twee reuze knienen mar hoe dan vàdder. Zelf hef ze naos Bouffon gien plekke veur nog twee van die grote diers. Eerst de baord Vinke ebeld. Die hef de hof ok stikvol, mar wol nog wel ene van de reuzen onderdak geven. Hoe dan die ene kniene op de Olde Wisselseweg an vanuut 't zuden van België?

En wat met die ander? Nee, dat zag zee ok niet zitten. De sleper evraog of die d'r in de parmetaotsie nog ene had die ich aover de diers wol ontfermen. Nao nog wat water en een preuze wottels kwamp die töt een oplössing. In zien darp steet een kinderboerderieje en daor waren de knienen van hàtte welkom. Annegien vulen zich op slag tien pond lichter worden. De knienen krieg een goeje olde dag en zee kwamp d'r as kortstondige eigenaar op ofstand goed van of. Dat ze de man uut 't noorden niet aover de ofloop heb informeert ku-j oe wel veurstellen. Iemand die zich zo weinig an de lèvende have gelegen löt liggen is noe niet wa-j nuump een lekker dier. Ze hef hef d'r 's nachts nog aover edreump. Vaste esnoerd in een brandende auto en twee Vlaamse reuzen die eur d'r net op tied uut halen. En dat viel dus weer reuze mee.

Groetenisse van uut de Vriestraat Renderklippen. GAIT.