Gait van de Renderklippen

Kleine vente bint nog onbevangen. Die draag niet de zwaore rugzak vol met regels en reglementen. D'r zit zogezegd gien hobbels tussen 't hàtte en de tonge. Mien nèèvien Luuk uut Zeeland is een goed veurbeeld. Hee denk niet nao mar dut. Zoas op de Veteranendag, waor as't mannegien zelf nog een alderkeizers ende van vot steet. Oom Bart was daor wel bie betrökken via zien missie in 't veurmaliuge Joegoslavië. En die hef kennelijk bie 'm 't vuur anesteuken. Toet ze langs de scholen gingen umme te vraogen wie mee wol doen an zon dag stun Luuk met de nebbe veuran. En zo kon 't gebeuren dat een stuk of vief kinder van de schole uut Oost-Souburg, onder wie vanzelf ok Luuk, nao Den Haag mochen umme daor de medailles uut te reiken an mansluu die 't lèven veil hadden veur veilig en vree. Luuk trek een vraogteken op't gezichte en snap niet wat ome Gait daor noe mee bedoelt. Ik heb 't 'm uuteleg. ,,Weurumme zeg ie dan niet gewoon dat die kêêls net as Bart evöchten heb as leeuwen?", zei hee en daor zat ik dan achter 't schrieförgel. Mar goed, terug nao de case zoas vandaag de dag een onderwerp heet. Luuk mos eers nog oefenen in de buurte van Aarem en da's ok niet naos de deure. 't Gung allemaole onwies goed. Ze konnen 't jonge goed met een gerust hàtte nao de residentie sturen. De koning was daor ok bie betrökken. Veur Luuk niet iets umme wakker van te liggen. As 't mien vrogger was aoverkomen had ik mien drie keer op ene dag mutten verschonen, mar de vente vandage de dag heb zoiets van: doe gewoon zeg, aww onder de krane met heit water staot krieg wule allemaole de rug nat. Noe is Luuk wel netties opevoed deur Ingrid en Marjo dus hee weet wel datte met tweewoorde mut sprèken. Met de VIP-busse worden ze opehaald. De zundagse kleerage an de klongels en dat op Den Haag an. Op 't Malieveld begunnen ze toch te beven, mar dat was niet van de spanning mar deur 't kolde weer naodat ze zoveule dagen van de Zeeuwse zunne hadden kunnen genieten. Luuk zwaaien nao ome Bart die met de blauwe pet op langs marcheren. Een blik van koning Willem Alexander. Daor mos die 't mee doen. Nee, dan Luuk. Hee zag de stoel staon met de naam van de koning d'r op en liet zich gelieke op 't portret zetten. Mar toen kwam met de koning 't echte wark. Luuk knipogen tegen onze vorst en die lachen vrindelijk terug. As d'r nog iets te ontdeuien viel dan was 't leste kossien ie esmölten. Luuk bedacht zich gien monument, halen de tillefoon uut de zak en stappen op de koning of. ,,Mag ik een selfie maken?", vreug hee, veurdat d'r ok nog mar ene van de veiligheidsmensen in kon griepen. En de koning? Die bleef lachen, zei op zien Hooghaarlemmerdieks dat 't eigenlijk niet kon, gevolgd deur zoiets as 'veuruit mar, niet vàdder vertellen' en flits, 't lag vaste veur de Zeeuwse eeuwigheid. Niet vàdder vertellen. Dat gebeuren ok niet. Hee zetten 't petret gewoon op facebook en dat sprak veur zich. As hee zelf veteraan is zal hee zich nog wel is ofvraogen waor as hee de moed vandan halen, mar daor heb vente van disse lèèftied helemaole gien last van. ,Jonk toch', zeiden zien olders. Mar die glummen ondertussen ok as een pauwe met drie státten. Ik kan 't mien veurstellen. De groetenisse vanuut de vriestaat Renderklippen. GAIT.