Gait van de Renderklippen

Ik wille Annegien gien concurentie an doen met eur boeken aover hondenavonturen. Nao de strapatsen van Bouffon die ik veurege wèke beschreef, noe weer iets waor een hond gien brood van lus. En dus nog mar een keer een verhaaltien aover viervoeters wat d'r zogezegd uut sprink. Storm is gaon liggen zei Roel van Nek. ,Ja, mar Rocco niet", gaf Wil 'm te kennen. Ik snappe dat ule d'r gien chocola van kunt maken. 't Slut op twee honde. Roel en Wil heb d'r zelf gien, mar ze bint alderkeizers gek met diers en dus kump d'r nogal is een viervoeter op visite in de Vegtelarie. Wat dat an geet is Vegtelarie een verkeerde benaming, want zowel Storm van hun oldste dochter as Rocco van ene in de buurte bint vredelievende honde.

Töt vergangen wèke dan. Rocco is een Tibetaanse terriër. Gien haor op zien lief die kwaod wil en dat bint d'r nogal wat. Nee, die ku-j net zo vake aover de kop strieken a-j mar wilt. En toch had Rocco beet. Wil had 'm met 't mooie weer effies nao buten edaon. 't Kwispelstätten van de hond gaf an dat 't in goeje eerde viel. Een bröksien hier en een bröksien daor, veur Rocco kon de dag niet meer kapot. Op een gegeven monument kwam de posbode anfietsen. Die lachen de hond toe en Rocco schudden vriendelijk met zien köppien. Nao ik mien heb laoten vertellen was d'r nogal wat te melden an huze Van Nek. 't Duren dus een steugien veur alles in de brievenbusse was verdwenen.

En toen…Ongeleuflijk….Bie de leste brief kwamp Rocco in de bene, dee-j een sprong en….greep de bode in de hand. Den waormee ze net teveurten de brieven mee in de gleuf had estop. Ik wete niet wie of d'r witter worden: de brievenbestelster of Wil. Ze hef niet zoas meestentieds bie zukke veurvallen gebeurt eroepen datte 't anders nooit dut. Daor schiet ie a-j onthand raak niet zoveule mee op. 't Was een ommenullig sportstieve postbode die d'r wieter veur de res helemaole gien wâârk van wol maken. Mar ie kunt oe veurstellen dat Wil en Roel d'r meer van wollen weten. De stemming worden d'r niet bèter op,want bie de pos ok een dikke blauwe brief. En toen ging d'r bie Wil een lampien branden. Die blauwe brief was degen die 't leste in de busse worden estop en waor Rocco op ansloeg. Dat kon gien toeval wèèn.

En dat was 't ok niet. De eigenaars van de hond mossen toegeven dat de langhaorigen wel vaker begint te grommen as d'r ene wat bie eur in de busse gooit. Mar ze waren zogezegd nog nooit de gebeten hond. ,,Mar ule hoef kennelijk ok gien belasting te betalen", gooien Roel in de ring. Zeg niet dat een dier nââns weet van hef en alles blauw blauw lut.'Annegien,onze dochter, denk dat de hond gewoon niejsgierig is. En niet kan wachten töt 't baassien de enveloppen lös maak. De andere dag kwam Storm opdagen. De hond van de oldste dochter dus.

Mar die Storm is metene gaon liggen. Mar goed ok, want de wind van de veurege dag was nog niet aover ewèèid. Wil was een dag hondsberoerd. Ze weet vanzelf da-j een gekregen hond niet in de bek meug kieken, mar in dit geval hef ze Rocco is effies bestraffend toe espreuken.

Doet d'r kalm met heer en ontvank de groetenisse van GAIT.