Gait van de Renderklippen

D'r bint van die dinge in 't lèven die een mense niet kan verklaoren. Iederene hef daor wel veurbeelden van. Wule op de Klippen kregen daor vergangen zaoterdag mee te maken. Merie en Annegien konnen de drèèj niet vinden bie de buis. Ik zatte in mien kamertien nog wat schriefwâârk te doen in ofwachting van de voetbal. Juventus tegen Reaal Madrid veur de Champions League.

Daor mutten de dames niks mee van doen hebben. Mar umdat ze 't anbod van de andere kanalen, met inbegrip van 't Apeldoornse kanaal, niet kon bekoren kreeg ik te heuren umme dat ik mar nao de kamer mos kommen en dat ik daor de voetbal wel kon bekieken. De Franse bulldog Bouffon van Annegien lag in de mande. Die hef de leste tied de mage van streek en begint d'r weer aorig deur te raken.

Annegien hef wel niet zoveule weet van de voetbal, mar die hoef ie niet te vertellen dat in de kool bie Juventus Buffon steet. 't Schèèlt mar ene letter met die kleine zwàtte starkholder van eur. De eerste helfte van de voetbal was hastik interessant. Aover en weer. En of ie 't noe geleuf of niet: elke keer as Buffon de balle uut zien hok halen dan begun Bouffon te blaffen. Toen Ronaldo um een keer te slim af was zetten de hond 't op een janken.

In de rus was hee weer vertrökken. Dat wil heel wat zeggen want as d'r lakkere dinge op taofel komp dan sprink hee de mande uut veur da-j töt drie kunt tellen. De tweede helfte van de wedstried was niet umme an te zien. Bouffon gooien een kussen aover de kop en a-j 't mien vraog deuk hee steeds dieper weg as de Spaanse alleskunners weer een balle achter Buffon scheuten. De worst en de keze op taofel had veur de eerste keer gien antrekkingskracht op onze viervoeter. Naodat Juventus veur de vierde keer mos vissen was 't poppetje gezien, kassien dichte. Merie mos zo neudig zeggen dat van dat getramp op de tillevisie zelfs een hond nog in slaop völt. Mar toen in 't journaal bie 't sport gedeelte za-k mar zeggen de Juventus keeper heel sportstief de nederlaag terecht vunm scheut de bulldog as een raket uut zien slaopplekke, vleug op de kiekkaste af en maken anstalten umme aover de buis te lekken. Toen ik daor wat aover zei begun Merie te schuddekoppen. ,,Man holt toch op, ule gaot zo te keer dat de hond d'r aoverstuur van raak."

Die is de nuchterheid zelve en met eur gewicht is dat een helen hoop nuchterheid tegelieke. Ie kunt d'r van alles bie bedenken. De Italianen speult in zwart wit en dat bint ok de kleuren van Bouffon. Veul meer zwart dan wit trouwens en dat was disse wedstried ok op Juventus van toepassing. Noe steet die Buffon al een half mensenlèven in de kool. Ze wilt 'm niet kwiet daor. En wat dat angeet is 't een parallel met de Bouffon van Annegien.

Annegien hef nieje brökkies vie de dierenarts ehaald en daor is Bouffon zienderogen van op eknap. Ik denke dat Buffon eerder met een brok in de kèèl zit. En nao die dramatische tweede helfte zal ik wieter veur de res wel töt mien eigen kamertien veroordeeld worden.

Ik haope dat ule de Pinkster goed eur ekomen bint. Ontvank de groetenisse van de hele kraom met inbegrip van GAIT.