Gait van de Renderklippen

Uule heb al een höttien niks van de baord Vinke eheurd. Mar hee is weer terug in 't niejs en hoe! Op de veurpagina van de kranten in Kleve en umgeving as Vliegende Holländer. Arend jug nog al is de grens aover umdat de benzine daor een stuk goedkoper is, 't Ende d'r nao toe rèkent hee niet mee. Hee weet as gien ander waor a-j gezellig kunt winkelen, want Arend beheurt töt de categorie manskeerls die daor op kick. Wat dat angeet lig hee net zo veule met zien gedachtengoed van mien en van 't Meneertien van de Krante of as Nederland van Nieuw Zeeland lig. Mar goed dan, veurege wèke weer op pad. De zinnigheid an koffie met gebak veur 't grote bosschappen doen mut heel groot wèèn ewes. Hee zetten de auto op een parkeerplaatse stief tegen 't centrum van Kleve an. En zoas vake bie de baord vieren de achteloosheid brulfte. Roef roef de wagen uut. Uren later en un bonke euroos lichter stiefelen hee tevrèènde weer op zien wagentien an. Verdikkeme. Ik had 'm daor toch in 't hoeke heer ezet. Nog mar is kieken. Niks te zien. Wel liepen d'r twee agenten en die hef hee mar aneklamp. De mannen zeien dat 't goed uut kwam want zee zohten um juus. Alles goed en wel, zei de baord, mar vertel mien eers mar is effies waor mien auto hier ââns kan staon.

,,Hier nââns, mart wel zeuventien kilkometer vádderop bie een garage", zeiden de wouten in uniform. Arend snappen d'r helemaole niks van zo a-j zult kunnen begriepen. ,Man, hei-j dan een steugien geleden niet de sirenes eheurd. Alles zat hier in Kleve vaste." Ja, noe hee de hàssens in de achteruut zetten kwam 'm dat niet onbekend veur. Mar wat had dat met zien verdwenen automobiel te maken? ,,Alles", zei de ene agent en de anderen knikken heftig van ja. De auto was van de bult egleden, een vrouwe knappen d'r baovenop en 't hele verkeer in Kleve en omgeving zat zo vaste as een muur. ,,Hoe kan dat noe, ik hebbe nog vief minuten staon praoten veurdat ik de stad in ging en toen was d'r niks an de hand", gaf de baord te kennen. ,,Dan heb ie misschiens te hard staon praoten ,want de auto stun in zien vrie en is van de bult of eraak." In Kleve keken ze zich de ogen uut, een Nederlandse wagen met volle vaart de weg op, zonder bestuurder. En die Vliegende Holländer Vinke hef 't eweten. Een beste boete an de klongels, met de taxi zeuventien kilometer vàdder. ,,Ik bin gelieke in estap. Heb de pampieren van de plietsie op de banke esmeten", zei hee.

Gelukkig gien scha bie mien want dan had ik 't wel ezien. Terug in zien eigen Heimat hef buurman Henk 'm 't rapport van de plietsie veur elèzen. Mar dan heb ik zelf ok nog al wat schaa Arend, mut hee ezegd hebben. ,,Ikker? Niks te zien", was zien antwoord. Mar Henk hef 'm met de neuze op de feiten edruk. Een gat as un vuus in de bumper en nog wat meer krassen en blutsen. ,,Ik denke dat bie oe 't gat in 't benul; nog ietsies groter is Arend", hef Henk 'm verteld. Mar die zat uut te rèkenen hoeveule koffie en gebak 'm uuteindelijk zollen kosten. Tegen de duuzend euro as ik 't goed begrepen hebbe. Mar goed dat de benzine bie de Pruus een stuk goedkoper is.

Onvank de groetennisse van GAIT.