Gait van de Renderklippen

Heerde zit te hannesen met 't verkeer in 't centrum. A-j 't zo heurt dan gaot d'r nogal wat luu met pien in de buuk van de ene nao de andere kante van de straote. Jan Tuinman is d'r daor ene van. Veur um is 't zo klaor as een kluntien: verkeerslichten anbrengen. De raodscommissie worden stil eleg umme Veilig Verkeer de mond te gunnen. Die wordt anedreven deur Windkrach van Astrid. Die störmen nao binnen en drééjen d'r niet umme heer. Windkracht kreeg tegenwind van de fraksies. 't Zit in de knup bie de Brinklaan en de Stationsstraote waor fietsers tegen 't heil in jag en as een olifant bie Jumbo de regels an de veurband lap. Veilig Verkeer hef d'r een specialist bie ehaald die de verkeerslichtenh nog niet gelieke neudig vindt. Iedere raaodsfraksie hef zo zien eigen oplössing en dus gebeurt d'r al jaoren lank niks. De raod gif 't college de schuld en 't college lot weten dat de raod gien richting an gif. Wat dat betreft bevindt de raod zich in goed gezelschap van een hele kladde fietsers die ok mar anknooit. Aoverdag hef Veilig Verkeer in Vörchten bètere zaken kunnen doen. Daor ma-j niet hàdder as met dàttig deur 't centrum heer. Noe vrug dat in Vörchten wel wat stuurmanskunst. 't Centrum is zo onwies groot da-j tegelieke gas mut geven en op de rem mut trappen umme d'r deur hen te rieden. Ton van de Vosse spiejen de gemeente nog wel op 't vessien umdat de bermen erbermelijk bint. Daor heb veural de schoolvente las van. Mar die bint vanzelf slechts één jaor met 't verkeer bezig: dat is as ze 'rt examen mutten doen. Daornao riejt de meesten toch mar een ende veur 't vaderland hen. Alle gekheid op een stökkien: 't centrumverkeer zol um eleg mutten worden zodat de zwaore trekkers niet langer veur aoverlast kunt zörgen. Dat wordt een duur grappien en de spaorpot van de gemeente is toch al niet zo groot. De raod hef zich uren lang bezig ehollen met accommodatie, sport en subsidie. Dat hölt allemaole een bettien verband met mekare. Wetholder Van Diek mos de raod biespiekeren. Dat deed hee mer veule elan. 't Worden een stuk dudelijker waor de schoen wrink. Wel halen hee op enig monument de boel sprèèkwoordelijk deur mekare. Hee wol tegeleke andasch besteed en andach eschunken zeggen en maken d'r beschunken van. En hoewel ze nao ofloop een glaaasien drink met mekare lup dat nooit uut de hand en geet d'rgien ene beschunken op huus an. Dat ku-j oe a-j de Brinklaan aover mutten ok egees niet permitteren. Met 't praoten aover de appartementen bie 't Zwarte Peerd in Waopmvelde waren ze gauw ree. Dat lag d'r niet an umdat Gert van der Rhee d'r niet bie was want die hölt as aoverbuurman van 't Zwarte Peerd de kaken stief op mekare as 't onderwâârpo te sprake kump. Die weet precies wanneer hee mut zwiegen en wanneer hee de rebbel mut reuren. En daor heb ze in de kommissie dan weer een hele hoop gemak van. 't Meneertien blif nao de raod nooit hangen. Die is druk met de verhaalties van de dialectkringe Heerde-Waopmvelde die weer een schriefwedstried hef ehollen. Een afweermiddel tegen 't Hooghaarlemmerdieks en 't Algemeen Beroerde Nederlands. Holt de klongels d'r onder. Groeteniise van GAIT.