Gait van de Renderklippen

Waopmveld wil 't wegstrieken, mar zal zich d'r misschiens toch bie neer mutten leggen: een erotische massagesalon. Nog wel an 't Waopmvelder Zand. En laot dat noe ok nog in 't geboortehuus wèèn van Hendik uut de Veldsiet! Pättie luu ze-k dat hee daor te vrog weg is eraak, mar dan nem ik 't gelieke veur 'm op. Bie Jennegien kump hee niks te kort.'t College is niet aover één nacht ies egaon. In de zaak van ach en wee zetten bee en wee twee leden in.

Allebeide met liefderale opvattings. Gien aoverdadigheid. want d';r bint nogal wat onderliggende problemen naodat ik begrepen hebbe. Mar Inez en Gerrit heb 't umme 't zo mar is te zeggen van onder en van baoven bekeken.

't Löt zich niet weg masseren. Wat an de Bloemstraote in Heerde moch ku-j an 't Waopenvelder Zand niet tegen hollen, bint ze van mening. Ze heb d'r wel alles an edaon umme al te grote gekkigheid tegen te gaon. Niet meer dan vieve op een dag meug de botten lieke laoten leggen. As ik Hendik geleuven magge - en weurumme zol ik dat niet doen - is 't pad nao de erotiek ok zo smal dat 't met meer kandidaten ok op dat vlak al geet botsen. Waopmveld kan nog wel bezwaor maken. Dat heet vandaag de dag zienswijzen. Zoiets as hoe de wijzen 't ziet.

En Waopmveld zal Heerde een alolde wiesheid veur hollen; wat gij niet wilt dat u geschiedt, doet dat ok een ander niet! Umme met de straoten te sprèken: niet verbloemen en niet laoten verzanden. D'r wordt deur de gemeente een kloktied in esteld. Ie zult dat mar mutten handhaven. Ze zult umme 't goed te doen de Nachtwacht in dienen te stellen. Dat 't allemaole knap gevuulig lig hoef ik uule niet uut te leggen. Erotiek hef met rozen te maken mar dit Waopmvelder pad geet niet aover rozen.

't Wordt temee een heel gedoe met kunst an de Iesselt. Ze nuump 't met een geleerd woord Biënnale. Alle gemeenten an de Iesselt tussen Doesburg en Zwolle doet d'r an mee. Met uutzundering van Epe. Dat hef toch al gien grote name as 't umme 't huusvesten van kunst geet. A-j ';t vergeliek met wat Heerde d';r neer hef ezet dan kom ie al gauw op 't beeld van 't kippenhok en de hoenderfarm. En dat dewiel dat juus Epe zoveule onder de leden hef die op dat vlak töt geweldige dingen in staot bint. Ie kunt met dit evenement gratis veur niks een hele bonke reclame veur oew gemeente maken. 't Is wel de kunst umme zoiets deur te kriegen. Nee, Epe is ââns anders wild van. Honderd procent nog wel. Meer varkenshoeder dat kunstbroeder. 't Raak ons niet, zult ze edacht hebben. Daor zit wel wat in: een klein stuksien mar bie Uune.

As Welsum bie 't referendum veur Epe had ekeuzen was 't anders ewes. Mar dat keus veur aover de Iesselt. Tja. En dat brenk mien op de gedachte dat noe 't met de rivier veur mekare is 't kanaal d'r bie inschut. De hogere overheid hef zoiets van: laot mar varen. En dat dan weer niet de boten die disse regio d'r 't liefste in zol willen hebben. Van Biënnale nao bevaarbnaar Knale is nog een hele stap. Mar ook daor hef Epe niet de pet nao staon. Ik laote in elk geval de koffie van Merie niet verwateren.

De groetenisse van 't hele spul met inbegrip van GAIT.