Gait van de Renderklippen

Epe honderd procent wild en Heerde honderd procent honds. Merie kik as ze de koffie veur mien neer zet aover de scholders mee en schuddekop. 't Is bie de wilde zwijnen of zeg zee en sjoks de keuken in. Ik blieve achter in verwarring. Voer veur psychologen. Bie ons um 't huus gien las. Dat steet dan ok op denkbeeldige grond. 't Ging d'r nogal heer in de gemeenteraod van Heerde. Gerrit van Diek kreeg de volle laoge. Hee hef nao ze zek de la vol liggen van luu die uuteglierd bint aover de hondestront, mar die lieten zich die aomd niet heuren of zien. Ze heb in 't college d'r nooit weet van ehad dat d'r zon preuze volk met hond aover de hei sjachert en daor hoge mee in de Top Tien komp van persoonlijke genoegens. Mensen van heinde, nee niet van heide, en veere die helemaole lós gaot met hond en al. 't College wil met een niejerwetse hutte die ze kiosk nuump en een speulweide, met èten en drinkensgelègenheid bie de bosschure meer volk nao Heerde trekken. 't Stuksien veur de honde uutlaot kleiner en de hei plus de schaopen veur luu die gien hond heb a-k 't goed begriepe.

Epe steet veur gek met zien hek, zeg 't peerdevolk. A-j richting Nunspeet riejt dan kom ie d'r achter hoeveule wilde vàrkes d'r bint. Ze heb vanaf 't kruuspunt in Tongeren via 't Soerel töt an 't rooster alles verrinneweerd. Umme te veurkomen dat een deel van die vàrkes op 't Eper dàrp an kump hef Van der Hoeve noe ene van de hekkens op slot edaon. Dat schient nogal is lös te hebben estaon. Mensen met peerde vuult zich beknot en volk met vernielde veurtuinen beschadigd. 't Is niet wat zol dat umme 't in disse tied van narcisme en narcissen met mekare in de rie te hollen. 't Is niet goed of 't deugd niet. Dat is zo ongeveer de bandbreedte. Paddie luu meent 't op te kunnen lossen deur 't hek van Epe nao de Renderklippen te verplaatsen of deur te trekken op Heerde an. Mar ik denke dat in de politiek daor gien hond veur warm te kriegen is. 't Ging in Heerde vanzelf umme veule meer dan in- en uutlaot van honde. De uutlaot van gas beveurbeeld die afnemt as ze 't vrachtverkeer niet meer aover de Zuidweg laot gaon. Epe schient daor mee akkoord te wèèn. Want vrachtwagens staot niet te boek als bezoekers van de Horeca an de Dellenweg.

Nunspeet ondertussen blif buuten schot met 't raster. 't Meneertien mos nao de voetbal daor en die zag met eigen oge dat nao de ambtenaren noe zelfs de vàrke in eroosterd bint. Mar 't help wel want de beeste heb drempelvrees. Met begrip veur wat d'r in Epe speult heb ze 't sportpark de Wildsangh enuump. De zang umme 't wild waormee Epe meer dan honderd procent scoort. Bie de voetbal nog een ampat veurval. Midden op 't veld trampen anvoerder Ronald Hoek van Nunspeet d'r ene van Lichtenvoorde per ongeluk tegen de schenen. Scheidsrechter Mulder greep metene nao de fluit. Hoekschop leggen hee uut. ,Man wat mankeert oe. Corners geef ze toch in Dèventer ok niet op 't middenterrein?' Ja, niet iedere hef gevuul veur humor mu-j mar denken. En dat heb wuule met al die vàrkes en honde noe net hard neudig. Ik kappe d'r mee. Net as an de Heerderweg.

Groetenisse van GAIT.