Gait van de Renderklippen

Een nieje Lente, een niej geluud. Dat zal veur de verbroederingsgemeenten Epe en Heerde misschien niet 't zelfde wéén. De beide gemeentebesturen denk anders aover de streekradio, die op bevel van de Stichting Nederlandse Lokale Publieke Umroepen töt stand mut komen. Heerde wil zich binden met onder andere Zwolle en Kampen, Epe hecht meer geleuf an Dèventer en Zutphen. Ie zollen ze alle drieje een pets umme de oren willen geven. De stichting die an menare wil knuppen wat niet bie menare heurt, de beide gemeentes die eur heil zuuk aover de Iesselt. In Hilversum en Den Haag heb ze nog altied de grootste muuite umme vaste te stellen welke culturen buten de Randstad heerst. En de gemeentebesturen heb op eur beurte niet 't flauwste vermoeden wat de inwoners zelf wilt. Heerde is daor al een keer hardhandig achter ekomen met H2O, Epe hölt krampachtig vaste an gemeenten waor onze burgers niks mar dan ook helemeoale niks mee heb veur zoveere ze aover de Iesselt lik. Allenig umme politieke spellegies deur te kunnen voeren.

En die beide gemeenten mut dan ok nog is een keer op één kussen liggen temee. Dat belaof weinig goeds veur de Umroep 795, waorveur 't Meneertien zich in de tied dat hee veurzitter was zo druk hef emaak. D'r was een commiesjeele radio in Olst-Wijhe die Epe an de bosschappenkörre wol vaste binden. Mooi niet met dank an Willem van der Vlugt die met veul persoonlijke inzet Epe en Heerde op eur historische banden hef ewezen. En noe wil 't nieje bestuur van Radio 794 wel weer die kante uut. Met as 't allemaole een bettien tegen zit as gevolg dat Radio 794 zich ofsplitst. Epe lèvert de grootste biedrage, mar Heerde stelt een prachtige studio veur een habbekrats beschikbaar. En dan lup daor dwars tussen deur nog 't tillevieziestation Noordoost Veluwe. 't Veredelde TV Hattem muww zeggen, want wa-j d'r an Epe en Heerde op vindt ku-j met ene keer knipperen van de ogen aoverzien. Niet zo verwonderlijk a-j naogaot dat 't spullegien wordt eleid deur mensen die niks met 't vak heb en 't kennelijk aorig vindt umme met de konte op 't pluche te zitten. Journalistiek mu-j met een vergrootglas zuken en dan zie-j nog net niks. Hattem maak dudelijk dat 't een stad is waor darpen zich niet mut menen gelieke te kunnen stellen. Ule meug mee doen a-j precies doet wat wule veurschrief.

Terug nao 't samen wâârken. Waor blif de kracht van 't platteland? Wanneer koomp die gemeenten tussen Apeldoorne, Zwolle en Amersfoort d'r is een keer achter dat ze deur ene vuus te maken dikke tegen de steden op ewassen bint? Of is dat minder interessant veur de politieke bazen? Merie kik aover mien scholders mee wat ik op schrieve en die schudt met eur wieze heuf. ,,Gait, ie bint een mopperkonte. Gaot terug nao de tied van 't kinderspel: geef 's een geluudje." Ja, dat zal wel zo wéén, mar aww'-t as buren al niet eens bint dan hef 't geluud van Epe en Heerde meer weg van een dissonant, ik bedoele een vals geluud. Ik hale de boel binnen en zal d'r nog is een naggien aover gaon slaopen.

Ontvank de groetenisse van de hele kraom met inbegrip van GAIT.