Gait van de Renderklippen

De scharrelaomde leken al heel wat in onze tied. Kennelijk was 't niet meer dan veurspel want naodat Robert Scholten hef laoten weten is Epe van noe af an pas warkelijk wild. Niet zo mar: veur honderd procent. Merie wis nao 't veurheufd. Die wil mien wiezer hebben. ,,Gait, ie gaot teveule met 't Meneertien van de krant umme en ie bint van de sensatie. Ie begriep d'r as zo vake weer helemaole niks van." Dat wild hef alles van doen met de wilde varkes en de herten waorvan wule d'r meer heb as zo ongeveer alle andere gemeenten in Nederland. En van dat wild mag noe heel Nederland, wat zeg ik, mag 't hele westelijke halfrond profiteren.

Regeren is veuruut zien. En ie wilt niet weten hoe slim onze hogere overheid daorin te wark geet. Jaoren geleden zetten ze een Eland as burgemeester neer en noe weer Van der Hoeve: hoe wild wi-j 't hebben? De hekkens dichte umme de wilde varkes gien kans te geven umme te ontsnappen en de toeristen vaste te hollen. De toerist die met behulp van hertebokken wild op Epe mutten worden., Ik hadde al een mooie strijdkreet in gedachten: ,Epe bie de wilde zwijnen af'. 't Meneertien hef mien op 't harte ebunden umme dat veural achterwege te laoten, want de man die d'r juus veur waak umme de kwaliteit van Epe hoge te hollen, niet Foppe Smit mar die anderen, Frits, an de aoverkante, woont bie um in de Rama-buurte en daor wil hee gien ruzie mee kriegen. In dit geval heibel in de tent. En de toerist wil juus uut de tent in luuksere huussies met alles d'r op en d'r an. Nog mar effies en ze biedt oe de masseuze d'r bie an in 't pakket. En daor haal ik de woede van Merie weer aover mien hen die mien seksisties en vrouwonvriendelijk nuump.

Met de Nieje Anthoniehof weer een zörg minder of a-j 't anders wilt zien weer een stuk zörg d'r bie. Van de baovenste planke. Ze laot de olties daor in hun weerde. Een onmundigen grote hof bie de deur. Daor was de openingshandeling. En heel wat luu bint d'r zogezegd met 't allergrootste plezier in etuind. Niet langer de senioren as wegwarpartikel. In Heerde wilt ze daormee ok de goeje kante uut en as ik liege dan doe ik dat in kommissie. Wat zeg ik: in twee kommissies tegelieke. Die van ruumte en samenwâârking. Ene van de raodsleden reuren an dat senioren vandage de dag zwemp in 't geld en drie keer in 't jaor nao Mallorca gaot. Dan zit ik met Merie onder 't gemiddelde want ik bin 'dr pas twee keer ewes en egees niet binnen één jaor! Wethol;der Jan Berkhoff weet ondertussen ook dat hee niet in een paleiselijk umgeving terechte is eraak mar gewoon in 't Sociale Domein. En daor daor doe-j 't niet gauw goed za-k ule vertellen.

A-j trouwens van de Klippen nao Heerde mutten rieden dan ku-j bèter brood mee nemen. Ze heb ie daor flink in de houtgreep za-k mar zeggen. Een afgezaagd onderwarp ku-j zeggen en tegelieke ene op 't scharpst van de snede. Dir is de leste jaoren aover gien onderwarp zo veule eboomd. 't Verlup allemaole heel rustig ok al haop Ons Mooi Epe dat ze van de wèke de bocht uut vlieg en dan 't liefste de Norelbocht. Ik legge de penne neer en beginnen nan de koffie veurdat 't aormee bocht wordt.

De groetenisse van GAIT.