Gait van de Renderklippen

Dat was 't dan zei Hendrik toen hee nao zo'n kleine driehonderd kilometer de camper an de kante zetten. Veur een feessien is hee wel te porren en al helemaole as 't umme een driedubbelen geet. Zelf zeuventig jaor op disse wereld, zien breurtien nog mar zestig en zien zuster vieftig jaor verknup met 't Meneertien. Tja, daor wi-j dan wel effies de pette veur tegen de zolder gooien. Ik ware eneug bie 't feest bie Post. Niet as Last Post en ok nog umme de Last Post nao zoveule heuglijke feiten te blaozen. Ik hadde makkelijk praoten. Op de fietse van de Renderklippen nao Uune stelt niet veule veur a-j 't vergeliek met dat ende onderuut Zeeland. Ik kon mien goed veurstellen dat Hendrik 't effies helemaole had ehad. Mar hee hef nog een heel höttien op zien eerste pilsien mutten wachten.

Eerst 't örgel en alles wat daor bie heurt uut laaien en op de goeje plekke zetten. Want hee is een hendige knooiert as 't umme iets in mekare zetten en uut mekare halen is en speult ok nog is een keer de liesters van 't dak of. Cobie, die ok al een kleine vieftig jaor naos um in de beddekaste lig, vun dat zien camper een bettien scheef stun. Vrouwluu heb altied al een schàrp oge ehad veur wat scheef geet. Dus hee weer op de bok en 't ding in 't rechte spoor ezet. 't Was nog niet helemaole goed nao 't zin van eur en dus nog ene keer vanniejs. Mooi niet. Gien bewèging meer in te kriegen. 't Slimste was niet dat ze nao de brulfte 's nachtens een klein bettien scheef zollen liggen, want daor mark ik nao bienao vieftig jaor en een aovend geheister niks meer van. Ze mossen ok nog is een keer met 't gevallegien op Zeeland an en dan maak stil staon 't ende niet kleiner. In 't gezelschap nog een hele optocht van mansluu die verstand van zukke dinge heb. Die heb zich d'r aover ebeugen en gien oplössing evunden. Dat blif oe dan toch zo een aovend umme de nek hangen. Bi-j bie de finish en dan krie-j te maken met startproblemen.

Met een stellegien an 't duwen en dat lèveren ok niks anders op as een stuk of wat verkreukelde jassies en vègen op 't sporthemp. Hendrik had 'm goed zitten. 't Buukien nao ekeken waor as de ANWB te vinden was en hoe of ie die zo gauw meugelijk die kante uut konnen kriegen. Toen de brulfte goed en wel bezig was kwam Raymond uut Apeldoorne bie Darpszicht anrieden. Die hef 't vak in de vingers zitten umme 't zo mar is te zeggen. Rustig….rustig…,zei hee tegen ';t opgewonden stellegien mansluu. Ik wil uule de wiesheid niet ontzeggen, mar laow beginnen bie 't begin. Ie ziet oew feessien en oew camper onderbreuken. Dat nuump wuulke in ons vak startonderbrèking. En met drukken hee op de knop die daor alles mee van doen hef. Dat is dan gauw klaor! A-j iets uutschakelt en niet weer herstelt dan raak ie in de problemen. Hendrik worden vieftig pond lichter. Hee hef die aovend espeuld, dat wi-j niet weten. Met noten estreujt waorvan hee niet wis dat hee ze in huus had. D'r zat in ene keer weer meziek in um en in de camper. Wieter veur de res niks meer van eheurd dus die zit weer hoog en nao ik haope ok dreuge bie de Deltawerken in de buurte.

Groetenisse van GAIT.