Gait van de Renderklippen

't Ene blikveld is 't andere niet. 't Meneertien hef 't in disse krante heel raak umschreven. De plekke veur 't Heerder gemeentetehuus waor a-j de bene konnen brèken aover de colablikkies en andere troep is umetoverd in een park umme u tegen te zeggen. Dat de bevolking zich an de kolde kante wanen hef alles met 't weer en niks met ongastvrieheid van doen. Inez Pijnenburg zag d'r uut umme op te vrèten in eur Dickens jurkien, mar dat is niks bezunders want ok in een jutezak zol zee de show nog stèlen. De mansluu hadden d'r een hoge hoed van op. Van Meurspark en weie sluut d'r goed bie an. Wie kunt allenig niet achter de hegge roddelen aover hoeveule dat allemaole hef ekost, want die hegge ontbrik nog.

Temee is in Heerde een kampioenschap hegge vlechten en daor mut wetholder Meier mar is gaon kieken hoe hee daor de financiën veur bie mekare kan knippen. Wolbert zetten de hoed al weer gauw of bie 't ceremonieel op 't veurplein. Veur de koetsier, dat wel. Hee hef wat tied neudig umme te wennen. In de raodsvergadering hadden bze 't aover 't geld wa-j kwiet bint an de invaliden parkeerkaarte. Nem mien niet kwaolijk, mar daor zo'j ok gehandicapt van raken. Vier keer zoveule as in Epe,mar die dut die kaarten ok wel alderkeizers goedkoop van de hand. Zwolle met honderd is toch ok nog wel wat anders as Heerde met naogenog honderdzeuventig euro. ,Dat maak dan allemaole niet zoveule uut a-j de gemeenten vergeliek met kaarte en keuring', zei Wolbert. Ik wete niet zo gauw hoeveule procent d'r tussen honderd en hondertdzeuventig zit, mar dat mut heel wat wèèn. Merie denk dat ze 't wel begrip. Meier kump uut de buurte van Gellemuden en daor heb ze tapijt zat umme zukke verschillen onder te vègen en dan vin ie 't niet meer terug.

In de raodszaal niet zoveule kerstversiering as anders. Allenig de burgemeester ging schuul achter een stel ballen. Dat zal een of andere balsturige bode misschiens hebben edaon, mar ik mudde uut kieken wat ik schrieve. want 't Meneertien wil gien kwaod woord heuren aover Klaas en konsjotten. Die veurziet 'm van een nattien en een dreugien. 't Kan ok wèèn dat de oppositie die rooie knikkers veur eur neuze hef ezet. Die is niet te passe aover 't kleine bettien wat 't college van H2O pries gif. Mar a-j niks verkoop ku-j toch ok gien hoop vertellen? Ze zek dat 't noe veur de Bakker geet. Democratie is een woord wat vake misbruuk wordt. Jan Tuinman zo-j d'r ok van kunnen verdenken. Die vreug an de burgemeester of hee moch blieven zitten. Mar beste Jan, daor beslis de kiezer toch aover? Mar volges Merie begriep ik d'r niks van wat disse keurige man op zien beurte bedoelen. Hee mos de Sherif uut Waopmvelde vervangen en dan is lange niet wat zol dat.

Wieter veur de res heb ik ok niet veule te melden. Ik haope daww met mekare rustig van 't ene in 't andere jaor verzeild raakt. ,Veul heil en pufferties", ze-k wule daorvan op de Renderklippen. Ik wens ule met al die schaopen um ons heer een blatende gezondheid in 2017 toe.

De groetenisse van Merie, Annegien, Bouffon en GAIT.