Gait van de Renderklippen

Ene keer in de zoveul tied bint wetholders loco-börgemeesters, dat wil zeggen locomotief van de gemeente. As Hans van der Hoeve van Epe scheeps geet en met zien Ada in't veuronder duk, dan mag ene van de massepanten 't over nemen. Eerst Robert Scholten, as die niet is Erik Visser en daornao is Dick van Norel an de beurte. As Hans, Robert en Erik tegelieke de deure van 't gemeentetehuus achter zich dichte doet is dus Van Norel an de beurte. In Epe zit ze niet zo gauw verlègen want ze heb nao Dick dan nog altied Joop en Jan achter de hand. ,,Wanneer 't helemaole niet anders wil nem ik 't wel aover want ik loop daor al viefenvieftig jaor in en uut ern wete misschiens nog wel bèter wat of d'r in Epe speult", zei 't Meneertien mien.

Mar kottens was 't zo vere dat Dick met zien vrouwe met de ketten umme de nek bie de Klaorbèèk noe binnen stiefelen. Die mut Hans achter laoten umme te veurkomen dat 't geval aoverboord geet as 't schip bie um en Ada an 't wiebelen kump. Dick met een onwies grote struuke namens de gemeenschap en zien vrouwe met een boeket van niemand minder dan koning Willem Alexander. ,,Ik hebbe respek veur uule. Zeuventig jaor, wuule bint nog mar goed aover de helfte", zei zee. ,,Hee ging d'r as oppas van De Boskamp uut en kwamp as vader des vaderlands bie de conculegaas van de Klaorbèèk weer nao binnen", grinneken 't Meneertien van de Krante. Die was ok eneug bie de zeuventigjaorige brulfte van Van Huffelen.

't Worden een genoeglijk onderonsien. De va van Dick en Jan van Huffelen heb een bonke narigheid belèèf met de april-mei staking in 1943 toen de Pruus ze klein mannegien wol maken. Bie een preuze gebak heb ze bie epraot. Van Huffelen is nog hastik sportstief en zit dagelijks op de fietse. Mar vlak Van Norel ok niet uut. Die hef 't ok lange niet altied mee ezèten. Umme te bewiezen dat 't weer helemaole goed met 'm geet wil hee volgend jaor een allang lèvende wens in vervulling laoten gaon: de Vierdaagse lopen met zien vier dochters. Dus a-j 'm temee met 't trainingspak an ziet stiefelen dan is 't niet umdat hee de Silo van Bibo zat is eworden. Veur da-j in Nimwègen slaag mu-j heel wat trainen kan ik uule verzekeren zei 't Meneertien die daor ok al een keer of wat de benen hef laoten wâârken.

De conlusie worden overigens al gauw etrökken dat d'r nog heel wat muziek in zit. Dat slug dan weer op de wetenschap dat Jan en Marie in Emst rond de tuba van um heel wat heb belèèf en noe met zien beigies nog de gang d'rin holt. Dick zien vrouwe menen dat de liefde veur de man niet allenig deur de mage geet, mar ok via de toeter. Zee kan 't weten, want toen Dick bie Soli Deo Gloria in Heerde saxofoon speulen had zeedaor de bugel an de lippen. Geleuf 't of niet: daor is iets moois uut voort ekomen. En as ik d'r zo aover naodenke liep 't stel zogezegd een heel ende veur de muziek uut. Toen lèèftiedgenoten op vriejersvoeten nog op zoektocht waren wissen zee al lange veur 't trouwen van toeten en van blaozen. As nao regen zunneschien kump dan mag nao alles wat töt noe evallen is de zunne töt an Sunterklaos blieven schienen.

Groetenisse van GAIT.